Isang bagong simula ang inaasahan ng returning overseas Filipino worker (OFW) na si Lilith Patigas Alliano, 51, matapos siyang makatanggap ng ₱50,000 AKSYON Fund Assistance mula sa Department of Migrant Workers (DMW).
Umuwi si Alliano mula Bahrain noong November 23, 2025, matapos ang tatlong buwang pagtatrabaho sa naturang bansa. Ayon sa kanya, hindi naging maganda ang kanyang karanasan sa abroad kaya napilitan siyang bumalik sa Pilipinas.
Pagkauwi, lumapit siya sa DMW at naghain ng reklamo laban sa kanyang recruitment agency. Na-process ang kanyang application para sa financial assistance noong February 11, 2026.
₱50K Gagawing Puhunan sa Tindahan
Sa kasalukuyan, umaasa rin si Alliano sa tulong ng kanyang anak habang nagtatrabaho naman bilang bangkero ang kanyang asawa. Gayunman, hindi regular ang kinikita ng pamilya dahil nakadepende ang trabaho nito sa turismo.
Dahil dito, malaking bagay para sa pamilya ang natanggap niyang ₱50,000 assistance.
Plano ni Alliano na gamitin ang pera bilang puhunan upang muling makapagbukas ng maliit na tindahan, na inaasahan niyang magiging dagdag na pagkukunan nila ng pang-araw-araw na gastusin tulad ng pagkain at pambayad sa mga bills.
Para sa kanya, ang tulong ay pagkakataong makabangon at muling magkaroon ng sariling pagkakakitaan matapos ang kanyang naging karanasan bilang OFW.
Mensahe sa Kapwa OFWs
Hinikayat din ni Alliano ang mga OFW na nakararanas ng crisis, emergency, o distressful situation na huwag mahiyang lumapit at humingi ng tulong sa DMW.
“Punta lang sila dito sa DMW, magsabi sila kung anong kailangan nila. Anytime naman, kahit anong oras, handang tumulong,” ani Alliano.
Nagpaabot din siya ng pasasalamat sa Diyos at kay Pangulong Ferdinand “Bongbong” Marcos Jr. para sa tulong na kanyang natanggap.
Sa pamamagitan ng ₱50,000 AKSYON Fund Assistance, umaasa si Alliano na maibabalik niya ang kanyang maliit na negosyo at unti-unting makapagsisimula muli kasama ang kanyang pamilya.
Mula sa isang mahirap na karanasan sa abroad, ang kanyang pagbabalik sa Pilipinas ay nagbukas ng panibagong pagkakataon—isang bagong simula na inaasahan niyang mapapalago sa pamamagitan ng sariling kabuhayan.
